VIGAN CITY – Agduduma a klase ti paltog ken bala iti naala iti maysa a lalaki kalpasan ti insayangkat a search warrant operation dagiti pannakabagi ti linteg idiay Sitio Manugak, Brgy. Butir, Sta. Maria.
Insayangkat ti operasyon dagiti kameng ti Sta. Maria Municipal Police Station iti pagtaengan ni Jaron Christian Bedar, agtawen ti tallopulo ket tallo babaen ti bileg ti search warrant nga inruar ni Hon. Elizabeth Garcia Bringas iti RTC Branch 72, Narvacan.
Naala manipod ti suspek iti maysa nga ARMSCOR GA12 Shotgun, maysa a HYDRA M16 rifle, maysa a Cal 45 pistol, dua a long magazine para ti M16 rifle, tallo a Hicap magazine para ti Cal 45 pistol, lima nga ammunition para ti GA12 shotgun, sangapulo ket uppat nga ammunition para ti Cal 45, limapulo ket walo a 5.56mm ammunition nga agpapada a nakarehistro iti nagan ti natayen nga amana a ni Ceferino Bedar.
Nupay kasta, addan ti kustodiya dagiti pannakabagi ti linteg ni Bedar ken dagiti nasao a paltog ken bala para iti proper disposition.
