VIGAN CITY – Innem nga improvised BOGA ti insuko dagiti residente ti Brgy Becques, Tagudin babaen ti naiwayat nga ARIRANG KONTRA illegal firecrackers iti nasao a lugar.
Sangapulo a piraso met ti nadumaduma nga polyvinyl pyrotechnic device wenno BOGA nga aggatad iti nasurok kumurang sangaribo a pisos ti insuko dagiti residente iti Brgy Nagtablaan ken Brgy Namatican, Sta. Lucia babaen iti nasao met laeng nga operasyon.
Idiay Sitio Malasin, Poblacion Norte, Salcedo ket nasarakan dagiti pannakabagi ti linteg ti dua a boga bayat ti panagpatrolyada iti nasao a lugar.
Nakitada dagiti dua a saan pay a nabigbig a teenagers iti kabambantayan nga agiiggem iti boga isu a nagsardengda ket idi makita dagiti teenager dagiti sumangpet a pulis, inibbatanda nga insigida ti boga nga iggemda sa immulida iti tuktok.
Dagiti boga ket addan iti kustodia dagiti pannakabagi ti linteg tapno maidalan iti husto a proseso.
Lima met nga improvised boga ken tallo a piraso iti Illegal firecrackers Kwitis ti nakumpiskar idiay Brgy Bantugo Mission ken Balaweg, Nagbukel manipud kadagiti grupo ti menor de edad a naaktuan nga agpap-paputok.
Dagiti naala a paputok ket aggatad iti PHP515 nga adda itan iti Nagbukel Police Station para iti proper disposition.
