VIGAN CITY – Uray naladawen ket makatulong latta para kadagiti agtartaraken ti baboy ti pannakaideklarar ti State of Calamity ti pagilian gapu iti African Swine Fever kas pinasingkedan ti Samahang Industriya ng Agrikultura.
Iti pannaki-uman ti Bombo Radyo Vigan kenni SINAG Chairman Rosendo So, nabayagen a kiddaw ti Committee on Agriculture iti pannakaideklarar ti state of calamity gapu iti ASF ngem saan nga insigida a napatgan.
Nupay kasta ket saan pay a naudi iti amin ta adu latta iti matulungan nga agtartaraken ti baboy isu a kiddawna a saan laeng nga agingga duapulo a baboy a maidalan iti culling operation iti mabayadan nu diketdi amin a maapektaran.
Kalikagum ni So a mapadaras iti panagited ti pondo ti Department of Agriculture kadagiti Local Government Units babaen iti Emergency Fund tapno maited iti naan-anay a tulong kadagiti naapektaran a hog raisers ken saanen a maipada pay idi kallabes a kalpasan iti pito wenno walo a bulan sakbayda a maala iti tulong pinansyal.
Kabayatanna, kayat ti SINAG Chairman a nainget a mabantayan ti ti Department of Agriculture iti panagiwarasto iti tulong pinansyal kadagiti naapektaran a hog raisers ken imbitaran manen idiay Senado tapno pagpalawagen inaig iti nabuntog a distribusyon iti tulong pinansyal idi kallabes.
