VIGAN CITY – Kalikagum ni Provincial Quarantine Officer Martel Quitoriano nga idagdagsen iti pannusa kadagiti masalamaan nga agiserserrek iti agduduma nga ilegal a produkto iti probinsia tapno maliklikan a maulit iti maikaniwas nga aramid.
Segun ken ni Quitoriano, nangin-ngina a multa wenno makasoan nga insigida pakairamananen ti nabayag a pannaka-impound dagiti lugan dagiti masalamaan iti maipataw tapno agbutengda nga agaramid iti saan a maiparbeng.
Inlawlawagna a kakaasi dagiti negosyante a sumursurot iti paglintegan idinto nga adda dagiti agpuspuslit ket nagdaras iti panagibiaheda iti ilakoda a produkto a saan a dimmalan iti aniaman a proseso a naiyetnag.
Nagyaman pay ni Quitoriano kadagiti pannakabagi ti linteg iti pannakitinnulongda iti Animal Quarantine tapno makemmeg dagiti agpuspuslit dagiti produkto iti probinsia.
Maipalagip a kinemmeg dagiti otoridad idiay Brgy. San Nicolas, San Esteban ni Juanito Navarro III, agtawen dua pulo ket maysa, driver iti Isuzu Crosswind kaduana ti menor de edad nga agtawen sangapulo ket pito a taga-Sta. Rita West, Aringay La Union gapu iti panangibiaheda iti saan a dokumentado a frozen products nga agdagsen ti nasurok kumurang lima gasut a kilo manipod Aringay, La Union a maipan kuma idiay Batac, Ilocos Norte.
