VIGAN CITY – Idurduron ni Senate President Pro Tempore Jinggoy Estrada ti nadagdagsen a pannusa kadagiti tattao a mangikabil ti palso nga impormasion iti birth certificate-da.
Nakapauneg iti Senate Bill 2703 wenno ti delayed registration of birth act proposal nga asinoman nga agaramid iti palso a statement wenno palso nga impormasion iti birth certificate-na ket maibalud manipud innem a bulan ken maysa nga aldaw agingga iti 12 a tawen ken agmulta iti saan a nababbaba ngem 100,000 pesos ken saan a nasursurok ngem P250 000.
No ti aglabsing ket maysa nga opisial ti publiko kas iti local civil registry, automatiko a maikkat iti serbisio ken saanen a mapalubosan nga agtakem iti aniaman a posision iti gobierno.
Awan ti multa ti delayed birth registration ngem masapul a maipila iti uneg ti 30 nga aldaw wenno masapul a maited ti rason no apay a naladaw ti panagrehistro.
