VIGAN CITY – Kaso a trespassing iti naipila kontra ken ni Melchora Reototar Retreta nga agtawen iti lima pulo ket uppat, balo ken agnaed idiay Sitio Namnama, Barangay Paratong, Sta. Catalina ta simrek iti paraangan ni Ilominada Pacis Palpallatoc nga agtawen iti pito pulo ket lima, balo ken agnaed idiay Barangay Poblacion East, San Ildefonso idi alas dose dyes iti malem idi July 4.
Segun ken ni Police Lt. Danilo Ricud, officer-in-charge ti San Ildefonso municipal police station, inuli ti suspek iti alad iti likudan a paset iti pagtaengan ti biktima a walo kadapan iti kangato na ngem nasiputan ti biktima isu a nagpaarayat kadagiti kaaruba na.
Idi damo ket aglalaok a lugar iti ibagbaga ti suspek a paggigiyanan na ngem babaen iti pannakikinnammayet ti San Ildefonso municipal police station kadagiti kabangibang nga istasyon ti pulisya ket nabigbig da ti suspek ken natunton da nu anya a lugar iti pudno a paggigiyanan na.
Mainaig dayta, naamuan pay nga adun dagiti nakairamramanan a pasamak ti suspek ta idi kalman ket adu dagiti napan nangkita kenkuana iti police station ket inbaga da nga isu iti aglaklako ti tilapia a switik iti pagkiloan na ken nu dadduma ket switiken na pay iti supli nga ited na kadagiti customer na.
