VIGAN CITY- Maibasura ket saanen mabilang pay, dayta iti kayat iti kampo ni dati a Sen. Bongbong Marcos kadagiti nabasa a balota manipud Bato, Camarines Sur a karaman iti ballot recount a rinugyan ti Presidential Electoral Tribunal (PET) idi kalman.
Segun ken ni Ilocos Norte Governor Imee Marcos, saanen a mabasa ken nadadaelen dagiti balota ngem kasapulan a malawlawagan no kasano a napasamak iti laksid a metallic iti ballot box a nakaikargaan na.
Imposible a mabasa iti kaudian a bagyo a dimmuprak idiay Camarines Sur ta dua tawenen iti napalabas.
Ti recount dagiti balota ket paset iti poll protest ti kabsat na kontra kenni Vice President Leni Robredo gapu ta patien na a naswitik dagiti botos iti bise presidente idi May 2016 election.
