VIGAN CITY – Impasigurado ni Gov. Ryan Singson kadagiti saan pay a nakaawat ti 2nd dose-na ti Sputnik V a mabakunaandan iti kabiitan a panawen.
Dayta ket kalpasan a simmangpet ti nayon a 37,120 a nadumaduma a covid-19 vaccines pakairamanan ti sputnik vaccine manipod national government a nakiddaw ken ni vaccine czar Carlito Galvez Jr.
Segun ken ni Gov. Ryan, namnamaenna nga ad-adu pay ti mabakunaan iti probinsia tapno saanen nga kumaru ti sitwasyon ti covid-19.
Kabatayanna, inlawlawag ti gobernador nga inton malpas laeng ti Enhanced Community Quarantine ti sangapulo ket siam nga ili ken dua a siudad iti Ilocos a makita ti resulta iti panagbaba ti kaso iti probinsia kas panangipakaammo ti Health Department.
Ngem nupay kasta ket maladingitan ti gobernador ta awan iti ili a covid-19 free iti probinsia ta adda aminen a kaso iti nasao a sakit.
