Pinalubosan ti Department of Foreign Affairs (DFA) dagiti babbai a naasawaan nga aramaten latta iti pilyedoda idi balasang iti passport-da iti salinong ti New Philippine Passport Act wenno Republic Act No. 11983.
Segun ti DFA-Office of Consular Affairs, mabalinen nga isubli ti maiden name dagiti babbai a naasawaan inton ag-renew iti passport ngem maminsan laeng a mabalin a maaramid kas maibasar iti linteg.
Iti section 5 paragraph f iti nasao a linteg, kasapulan laeng nga agpresentar ti PSA-authenticated birth certificate, ken dadduma pay a dokumento a mangipakita iti agpapada a pannakaaramat ti maiden name ken dadduma pay a valid IDs.
Kadagiti kalikagumna nga isubli ti maiden name-na ta natayen ti asawada, annulment, legal separation wenno judicially recognized foreign divorce ket masapul nga agipasa ti mayataday a dokumento kas iti PSA-issued Certificate of Death wenno annotated marriage certificate.
Karaman dagiti kasapulan nga ipasa ti notarized affidavit of explanation a mabalin a maidownload iti website ti DFA-OCA.
