VIGAN CITY – Pinasingkedan ni ACT Teachers Partylist Secretary General Raymond Basilio a rebbengna laeng a maipaayan iti naan-anay a kompensasyon dagiti mangisursuro nga agserserbi a kas poll worker tunggal eleksyon.
Segun ken ni Basilio, saan a makanay ti siam a ribo a pisos a gatad ti honoraria nga agdama a maipapaay kadagiti mangisursuro gapu ta umab-abot iti lima agingga innem nga aldaw ti panagtrabahoda kas poll worker a manipud iti panagtraining, panagala kadagiti paraphernalia, testing ken sealing dagiti makina, ken panangisayangkat iti eleksyon isu nga idi pay laeng damo ket kayatdan a manayunan ti maited kadakuada nga honoraria.
Nupay kasta, kiddaw ti grupo a maited ti honoraria nga awan ti maipataw a buwis kadagiti mangisursuro agsipud ta ti panagserbida iti kada eleksyon ket maibilangen nga espesyal a trabaho.
Punto ti opisial nga uray manayunan ti honoraria a maipapaay kadakuada no mabuwisan met laeng ket awan met laeng ti serbina.
Maipalagip a suportaran ti Commission on Election ti panangipangato ni Presidente Ferdinand Marcos Jr ti allowance ken honoraria a maited kadagiti mangisursuro wenno poll worker nga agserbi iti eleksyon imbes a mailibreda iti buwis.
