VIGAN CITY – Kaso a murder iti sangwen dagiti agama a nangbagsol ken nangpapatay ti maysa a lalaki idiay Brgy. Nanerman, Sto. Domingo.
Iti pannaki-uman ti Bombo Radyo Vigan ken ni PLt. John John Garan nga OIC iti Sto. Domingo Municipal Police Station, narurod dagiti agama a da Reynaldo Domingo, agtawen ti limapulo ket pito, naasawaan, karpentero; ken Marvin Domingo, agtawen ti duapulo ket dua, baro, helper nga agnaed iti Brgy. Naglaoan, Sto. Domingo gapu iti nangngegda a sinarita ni Edralin Pilar Lazo, agtawen ti tallopulo ket siam, naasawaan, awan iti trabahona nga agnaed idiay Nanerman, Sto Domingo bayat ti pannakisaritana babaen ti cellphone ti kina-inoman dagiti agama.
Segun ken ni Garan, biglada lattan a napan iti ayan ni Lazo ket prinubokarda idin napan ni Reynaldo iti likod ti biktima ket binagsol na iti baba a paset iti akin-kannawan a kili-kilina ngem naagaw ti biktima iti naaramat a kutsilyo isu a nadangranna ni Reynaldo.
Naipan pay laeng iti Northside Doctors Hospital ti biktima ngem naideklarar met laeng a natay idinto a naipan met laeng iti nasao nga ospital ni Reynaldo ta nagsagaba dunor ti nadumaduma a paset ti bagina.
