VIGAN CITY – Nalaus ti panagyaman ni Miss Universe Philippines 2022 Top 16 Jewel Alexandria Palacat, a nangibagi iti probinsia iti nasao a pageant kalpasan a nakastrek iti Top 16 ken ti pannakagun-odna iti Miss Friendship Award ta adu ti naadalna iti Miss Universe Philippines pageant journey-na.
Iti exclusive interview ti Bombo Radyo Vigan ken ni Palacat,ammona nga impakatna amin a kabaelanna tapno mangabak ngem uray saanna a naala ti korona ket naragsak isuna a mairaman iti top 16 nga isu ti umuna a gundaway ti Ilocos Sur a maibilang iti nasao a placement.
Dagiti positibo a komento ti ad-adda a nangpapigsa iti kumpiansana ken insungbatna met kadagiti negative feedbacks iti performance-na a no adda iti entabladon ti maysa a kandidata ket saan a nalaka a mapagbalin a perpekto ti amin.
Numan pay adda dagiti negatibo a maibaga dagiti tao ket ibilangna laengen a pagadalan ta nataltalek nga imbagina a nasayaat ti probinsia nga Ilocos Sur.
Kabayatanna, sisasagana ni Palacat iti aniaman a gundaway a maited manen kenkuana ta planona ti agsublinto iti national stage iti sumaruno a tawen.
Namnamaenna a sisusuportanto latta kenkuana ti provincial government a maysa kadagiti pagyamyamananna ken ti panagtalekdanto manen kenkuana a mangibagi iti probinsia para kadagiti sumalianna a beauty pageant.
No met ni Miss Ilocos Sur ti sumungbat iti question ni Miss Pasay Celeste Cortesi a nakronaan kas Miss Universe 2022 nga “If you could stop time for a day, how would you spend it?”
Insungbat ni Palacat iti panaginana, panag-reboot manipud iti nabannug a bulan ken tawen tapno magun-odna dagiti arapaapna ken makasubli a natibtibker, kasta payen nga ipaayanna ti oras ti bagina.
