Maysa a motorsiklo ti tinakaw ti saan pay nabigbig a suspek idiay Barangay Suso, Sta. Maria, Ilocos Sur.
Ti biktima ket ni John Lloyd Ablog Areola, agtawen iti duapulo ket maysa, room attendant, taga-Barangay Nagtupacan, Sta. Maria.
Nagreport ti biktima iti Sta. Maria Police Station a ti Rusi Flair 125 motorcycle-na, a daytoy ket adda red hot wheel sticker-na, ket tinakaw ti saan pay nabigbig a suspek.
Segun iti biktima, alas nube ti December 24, 2024, impabulodna ti motorsiklo iti kayongna a ni John Lloyd Vendiola Bisenio ken naisubli kenkuana iti alas dyes y media iti rabii iti isu met laeng nga aldaw.
Naiparking ti motorsiklo a nakaikabil ti tulbekna iti sangwanan ti Sorrento Hotel, Barangay Suso, Sta. Maria.
Alas singko y media iti agsapa ti December 25, 2024, natakuatan ti biktima nga awanen a nakaparking ti motorsiklona ket idi kitaenda ti CCTV a naimuntar iti establisimiento, alas dose y media ti December 25, 2024 ket maysa a saan pay nabigbig ti nangitaray iti lugan.
Saan a nagpakaammo nga insigida ti biktima kadagiti pannakabagi ti linteg ta impagarupna a paglulukwan dagiti gayyemna isu a nangnamnama nga amangan a makitananto met laeng ngem agingga ita ket saan pay a naisubli kenkuana.
