Narekobre dagiti pannakabagi ti linteg ti maysa a motorsiklo iti national highway ti Barangay Bio, Tagudin, Ilocos Sur a daytoy ket immunan a naireport a natakaw.
Nagreport ni Joserick Vergara Manzano, agtawen iti duapulo ket walo, Project Staff ti Tagudin Animal Quarantine ken taga-Barangay Bimmanga, Tagudin kadagiti pannakabagi ti linteg inaig iti nabaybay-an a motorsiklo a nakatulbek.
Minaneho ken imparking daytoy ti maysa a babai iti asideg ti Ilocos Sur Animal Quarantine.
Nagresponde dagiti kameng ti Tagudin Police Station ket idi kitaenda ti motorsiklo, narekobreda ti official receipt ken student driver’s permit a nainagan ken ni John Lloyd Ablog Areola, taga-Barangay Nagtupacan, Sta. Maria.
Nakikammayet ti Tagudin Police Station iti Sta. Maria Police Station ket naduktalan a ti motorsiklo ket naireport a natakaw idi Enero 24, 2025.
Idi kitaenda ti CCTV footage ti establisimiento, alas dyes iti rabii ti Enero 29, 2025 a naiparking ken naibati ti motorsiklo babaen iti saan pay a nabigbig a babai a nakasuot iti puraw a hoodie.
