VIGAN CITY – Sapsapulen dagiti pannakabagi ti linteg dagiti dua a saan pay nabigbig a lalaki a nangtakaw iti motorsiklo idiay General Luna Street, Barangay V, Vigan City.
Ti motorsiklo ket kukua ni Sherwin James Ardaniel Biñan, agtawen iti duapulo ket tallo, security guard, tubo iti Isit, Dolores, Abra, ngem aggigyan idiay Barangay II, Vigan City.
Alas syete iti rabii ti Mayo 24 idi imparking ni Biñan ti Suzuki Raider FI iti nasao a lugar sa napan iti Hotel Luna Annex building tapno mapan agtrabaho kas gwardya.
Idi nalpas ti trabahona iti alas syete iti agsapa ti May 25, sinublina ti lugar a nangiparkinganna ti motorsiklona ngem natakuatannan a mapukpukaw.
Iti imbestigasyon ti Vigan City Police Station ken basar iti CCTV footage, tinakaw dagiti dua a saan pay nabigbig a lallaki ti motorsiklo a dagitoy ket naglibas a nagturong iti saanen nga ammo a direksyon.
