VIGAN CITY – Natukkol ti akin-kannigid a saka ken nadunor ti nadumaduma a paset ti bagina ti maysa a drayber gapu ti panagdinnungpar ti motorsiklo a minanehona ken ti maysa a trailer truck idiay Barangay Sabuanan, Sta. Lucia, Ilocos Sur.
Nabigbig ti nagmaneho iti Yamaha Aerox a motorsiklo a ni Danilo Galima Arciso, agtawen iti limapulo ket maysa, merchandiser, taga-Barangay Talogtog, Candon City.
Ti met Isuzu Giga trailer truck ket minaneho ni Jurney Zaparita Rimpillo, agtawen iti duapulo ket uppat, taga-Barangay Acao, Bauang, La Union.
Agpapa-abagatan ti trak iti national highway idin ta madanonda ti nakapasamakan ti insidente, nagpreno ti sarsarunwenna a lugan gapu iti trapiko.
Segun iti drayber ti trak, nagpreno ngem saan a nagfunction, isu a napan iti bangir a linya ket nagdinnungparda ti agpapa-amianan a motorsiklo.
Saan met a naan-ano ti drayber ti trak ken saan pay nga ammo no mano ti gatad ti nadadael a paset dagiti lugan.
