Masapsapul dagiti dua a lalaki a nangtakaw iti motorsiklo a nakaparking iti sangwanan ti pagnanaedan ti maysa a babai idiay Barangay Otol-Patac, San Ildefonso, Ilocos Sur idi kalman, July 4, 2025.
Ti biktima ket ni Lara Mae Palermo Tanora, agtawen iti duapulo ket tallo, tubo idiay Dolores, Abra nga agdama nga agnaed idiay Barangay Otol-Patac, San Ildefonso idinto a dagiti dua a suspek ket saan a nabigbig.
Nagturong ti biktima iti San Ildefonso Municipal Police Station ket impakaammona a ti nangisit a Yamaha Mio I 125s na nga adda plate number 511 ACP ket innala dagiti dua a lallaki.
Naammoan nga imparkingna iti sangwanan iti pangnanaedanna iti nasao a motorsiklo karamanen ti nakaipan a tulbek.
Sakbay ti pasamak ket dua a lallaki a nakalugan iti nalabbaga a motorsiklo iti nagsardeng iti sangwanan iti pagtaenganda a gimmatang iti sigarilyo ket idi pimmanawda, ti back rider iti nasao a motorsiklo iti nangmaneho iti tinakawda a motorsiklo ken nagturong iti amianan a direksyon.
Iti pannaki-uman ti Bombbo Radyo Vigan ken ni PEMS. Jayson Sablay, itay laeng parbangon, nasarakan ti motorsiklo iti nasipnget a paset iti kalsada a sakupen met laeng idiay Otol-Patac isu nga intawagna kadagiti otoridad ket idi nagrespondeda ket kumpirmado nga isu iti natakaw a motorsiklo ket naikkat iti plate number-na ngem nakita iti compartment ti plaka.
Agtultuloy iti panangsapul dagiti otoridad kadagiti suspek a nangtakaw iti nasao a motorsiklo ta manarimaanen iti panangkitada kadagiti CCTV footage a mabalin a makatulong kadakuada.
VIDEO – PEMS JAYSON SABLAY
