Narekubren dagiti otoridad ti motorsiklo a natakaw iti sangwanan ti maysa a bakery idiay Del Pilar Street, Barangay III, Vigan City.
Ti akinkukua ti Motorstar Easy Ride 150 CL ket lalaki nga agtawen duapulo, baker nga agnaed idiay Barangay Paoa, Vigan City idinto a dagiti suspek ket dua a lalaki nga agtawen iti duapulo a taga-Caoayan ken agtawen iti innem a pulo ket innem a taga-Vigan City.
Iti pannaki-uman ti Bombo Radyo Vigan ken ni PLt. Col Reynaldo Mendoza Jr. manipod Vigan City Police Station, imparking ti biktima ti motorsiklo iti sangwanan iti bakery ket aminado a napanawanna a nakatulbek ket idi agsublin ta mapanna koma kitaen ket isun ti pannakakitana nga awanen isu a nagpaarayat kadagiti otoridad.
Segun ken ni Mendoza, naduktalan a dua a lallaki iti nangala ti motorsiklo babaen iti naisayangkat ti backtracking kadagiti CCTV footage isu a nabigbig dagitoy a gappuanan ti pannakakemmegda ken narekubre iti motorsiklo iti asideg ti maysa a hotel idiay Barangay 1, Vigan City.
Nakakustodiyan kadagiti pannakabagi ti linteg dagiti suspek ken naipilan ti kaso kadakuada.
