VIGAN CITY – Nasarakan idiay Barangay Poblacion Este, Sta. Cruz, Ilocos Sur ti maysa a motorsiklo a tinakaw ti maysa a baro idiay Tarlac City.
Segun ti Sta. Cruz Municipal Police Station, ti Suzuki Raider 150 motorcycle a color blue, black ken silver nga awan ti plate-na ket minaneho ni John Lee Pajango Belda, agtawen iti duapulo, nga agnaed idiay Magayepyep, Sallapadan, Abra.
Idi September 11 iti alas sais agingga alas otso iti rabii, bayat ti panangisayangkat dagiti pannakabagi ti linteg iti COMELEC checkpoint iti Barangay Poblacion Este, Sta. Cruz ket nasaedanda iti napaspas a motorsiklo nga awanan ti headlight-na ket idi nasaludsodda nu adda iti driver’s license ti driver ken dokumento iti motorsiklo ket awan iti aniaman a naipresentarna.
Boluntaryo a simmurot ti driver kadagiti otoridad pakairamananen ti motorsiklo a naglugananna isu a naipan iti Sta. Cruz Police Station para iti imbestigasyon ket naduktalan a ti driver ket mapapati a nagtakaw iti motorsiklo nga UEMI Suzuki Tarlac City Branch isu a nakikammayet dagiti kameng ti Sta. Cruz Police Station iti Tarlac Police Station para iti kumpirmasyon.
Idi September 12 iti alas singko kinse iti malem, nakasangpet dagiti kameng ti Tarlac PNP iti Sta. Cruz PNP kaduada ti representative iti UEMI Suzuki ket kinumpirmaranda a ti nasao a motorsiklo ket natakaw idi September 11 iti alas otso y media iti bigat ken naipakaammoda laengen iti Tarlac PNP idi September 12 iti agdama a tawen.
