VIGAN CITY – Manarimaan iti panangtakuat ti Sta. Maria Municipal Police Station nu siasino iti akinkukua iti naabandona a motorsiklo idiay Maynganay Norte, Sta Maria idi kalman.
Iti pannaki-uman ti Bombo Radyo Vigan ken ni PLt. Joel Dasargo nga OIC iti Sta. Maria PNP, adda pay laeng iti kustodiyada iti nasarakan a Yamaha Mio i125 nga awan iti plate numberna ni Elmer Tamayo Limon iti kaunasan iti nasao a lugar idi mapan koma agapit iti unas.
Segun ken ni Dasargo, idi nakita ni Limon iti nasao a motorsiklo ket adda iti tulbekna a nakapondo ket pinaliiwna nu adda iti mapan mangala ngem awan iti naurayna isu nga impakammona ken ni Kagawad Brigido Andrion nga isu iti nangipakammo kadagiti pannakabagi ti linteg.
Ita nga aldaw ket maipan idiay Land Transportation Office ti verification iti nasao a motorsiklo tapno ma-trace ti akinkukua iti nasao a motorsiklo.
Kabayatanna, mayur-uray iti report iti dadduma pay a PNP Station iti probinsia nu adda iti naireport kadakuada a napukawan iti motorsiklo.
