Maysa a motorsiklo ti tinakaw ti saan pay nabigbig a lalaki idiay Quirino Blvd., Barangay II, Vigan City.
Nabigbig ti akinkukua a ni Aubrey Horstman Balbuena, agtawen iti duapulo ket lima, food handler iti maysa a panganan, agnaed iti nasao a lugar.
Iti pannaki-uman ti Bombo Radyo Vigan ken ni PLTCOL. Reynaldo Mendoza Jr., Acting Chief of Police iti Vigan City Police Station, babaen iti CCTV, makita ti suspek a nagsipot nga immuna sakbay nga inasikganna ti motorsiklo.
Idi makitana a nakatulbek, napan nangala iti helmet ket pinaandarna ti motorsiklo nga inruar ket nagturong iti amianan a direksion.
Innayon ni Mendoza nga awan ti security guard nga agbambantay iti parkingan ti nasao a panganan a pagub-ubraan ti biktima.
Iti agdama, kitkitaenda dagiti posible a rimmuaran ti suspek babaen iti panangkitada pay kadagiti dadduma a CCTV.
Pinaingkedan met ni Balbuena nga alas dose iti tengnga ti aldaw idi imparkingna ti gray Yamaha Mio Gear ti motorsiklona ta napan idiay San Sebastian, San Vicente para iti catering.
Bayat ti panagsukatna, nalagipna a nabatina ti sapatosna iti compartment ti motorsiklona isu a tinawaganna ti naub-ubing a kabsatna a lalaki a mapan mangala.
Alas kuatro y media iti malem, timmawag ti kabsatna a mangibagbaga nga awan ti motorsiklona ket nalagipna a nabatina daytoy a nakatulbek isu a dagus a nagpatulong kadua ti ikitna iti Vigan City Police Station.
