Motorsiklo a kukua ti maysa a BFP member, mapukpukaw

VIGAN CITY – Mapukpukaw ti motorsiklo a kukua ni FO1 Justus Lois Guiquing Jurado, agtawen iti duapulo ket lima, BFP member a naidestino idiay Malabon City Fire Station, tubo iti Dodan Penablanca, Cagayan ken agdama nga agnanaed iti Barangay Sta. Ana, Taguig City.

Segun ken ni Jurado, alas singko iti malem idi kalman idi imparkingna ti motorsiklona iti Calle V delos Reyes, Barangay 1, Vigan City ket pinanawanna.

Alas nuebe iti rabii iti isu met laeng nga aldaw, naduktalanna a mapukpukawen ti motorsiklona idi napanna sinubli.

Nupay kasta, ikagkagumaan dagiti pannakabagi ti linteg a makaala iti CCTV camera iti nasao a lugar ken kumita kadagiti witness.