VIGAN CITY – Panaglabsing iti Article 151 ti Revised Penal Code wenno ti Resistance and Disobedience ti sangwen ni Nicolas Galicia, agtawen iti tallopulo ket dua, Messanger ken Janitor iti BPI Candon a taga-Brgy Tablac ken natiliw idiay Brgy San Antonio.
Nabigbig dagiti biktima a da Joey Rosario, agtawen iti duapulo ket walo; Alvin Gacutan, agtawen iti tallopulo ket maysa a taga-San Nicolas ken ni Jeffrey Valdez, agtawen iti uppat a pulo ket siam a taga-Brgy. Cala-oan, agpapada a miembro ti Public Safety Traffic Management Division iti siudad.
Naka-duty dagiti traffic enforcer iti sangwanan ti simbaan idin ta naranaanda ti maysa nga XRM motorcycle nga agmaris iti nangisit, awanan iti plaka a minaneho ti suspek ken ti saanen a nabigbig a kinalubbonna.
Nadlaw dagiti biktima nga awan ti headgear ti backride ti suspek ken awan ti side mirror ti motorsiklo a naglugananda.
Nagsardeng ti suspek ken ti backrider na iti sangwanan ti BPI Bank ket napan sinitar ken tiniketan dagiti biktima a traffic enforcer ngem kinarit ida ti suspek babaen ti gemgemna a puon ti pannakatiliwna.
