VIGAN CITY – Awan pay laeng ti pamalpalatpatan dagiti pannakabagi ti linteg iti motibo ken suspek ti pannakapaltog ti maysa a lalaki idiay Sitio Caguitaraan, San Julian Norte, Vigan City
Nabigbig ti biktima a ni Danilo Frando Piano, agtawen iti limapulo ket innem a taga-Purok a Bassit ngem agkaskasera iti nasao a sitio.
Iti pannaki-uman ti Bombo Radyo Vigan ken ni P/Col. David Dulnuan ti Vigan City PNP, dagiti dua nga apo ti biktima iti nakaimatang ti panagbaba ti suspek a nakalugan iti nalabaga a kotse, mapatta-patta a 5’4 ti katayagna, kalalaingan ti pammagina, naka-jacket ken nakakallugong.
Agwelwelding ti biktima idi pinaltugan ti suspek babaen iti mapapati a caliber 45 ti lapayagna ket kinamat pay dagiti appona a binato ti kotse.
Nupay kasta, awan ti rekord ti biktima iti kapulisan ken awan ti nadakdakamat dagiti putotna a nakaririna iti kallabes wenno nangpangpangta iti biagna.
