Imbasura ti Sandiganbayan Second Division ti mosyon iti Office of the Ombudsman nga ikkaten nga akusado iti kaso a graft ni dati a Department of Public Works and Highways (DPWH) Secretary Manuel Bonoan.
Maibasar iti sangapulo ket dua a panid iti resolusyon iti Sandiganbayan, naibasura ti Motion for Leave to File Amended Information gapu iti pagkurangan ti memo.
Inlawlawag ti Sandiganbayan a saan a mabalin nga ikkaten ti prosecution ni Bonoan ta agpada nga akusado iti kaso a sangsangwen ni Senator Jinggoy Estrada ta adda karbengan ti maysa nga akusado a mangnamnama iti nakailanad iti orihinal nga impormasyon iti nagbalin a sungbatna apaman a ma-arraign.
Gapu dayta ket saan a mabalin nga agaramid iti dakkel a panagbaliw ti prosecution iti kaso no makaapektar dayta iti karbengan ti akusado.
Inlawlawag ti anti-graft court a ti plano nga ikkaten ni Bonoan kas co-accused ket maysa a dakkel a panagbaliw iti kaso ken mabalin a makapadakes iti depensa ni Estrada.
Napateg pay nga agtalinaed ni Bonoan kas akusado ta mabalin a makaapektar dayta iti panangidatag iti ebidensia, panangbigbig iti nagbalin nga akem iti tunggal akusado ken nainget a panagtratar kadagiti isyu nga adda pakainaigan ti kaso.
