Kinumpirmaran ti Philippine Coast Guard (PCG) ti presensia ti “monster ship” ti China Coast Guard iti asideg ti Luzon idi Sabado.
Segun ti PCG nga immuna a nasaripatpatan ti team-da ti CCG vessel 5901 agarup 54 nautical miles ti kaadayona manipud Capones Island, Zambales babaen iti inusarda a Dark Vessel Detection System ti Canada.
Inpatulodda ti BRP Cabra, maysa a helikopter, ken ti PCG Caravan, a nangpasingked nga alas singko ti malem nga adda iti Chinese vessel ti nasao a lugar.
In-radio challenge ti PCG ti CCG nga addada iti uneg ti exclusive economic zone (EEZ) ti Pilipinas.
Iti alas otso ti rabii, nagpalaud ti barko ken naudi a nakita iti 85 nautical miles ti kaadayona manipud Zambales.
Ti “monster ship” ket agdagsen iti 12,000 a tonelada, a maminlima nga ad-adu ngem ti dua a kadakkelan a barko ti Philippine Coast Guard (PCG).
Segun kenni National Security Council Assistant Director General Jonathan Malaya a saan a pakasdaawan nga adda monster ship ti China nga aglemlemmeng iti Bajo de Masinloc gapu ta nabayagen a saksakupen dagiti barko ti China ti lugar.
Inanyonna pay a makaasideg pay laeng dagiti mangngalap a Pilipino iti nasao a lugar gaputa siguraduen ti Bureau of Fisheries and Aquatic Resources (BFAR) ken ti PCG ti agtultuloy a pannakaidanon ti krudo ken dadduma pay a suplay kadagiti mangngalap tapno suportaran dagiti aktibidadda iti nasao a lugar.
