VIGAN CITY – Ipakammu ni Provincial Board Member Efren “Rambo” Rafanan, Committee Chairman ti agriculture ditoy probinsya kenni Gov. Jerry Singson iti parikot ti asukar ditoy pagilyan ta maisayangkat ti monitoring.
Iti pannaki-uman ti Bombo Radyo Vigan kenni Board Member Rafanan, masapol a mai-activate ti monitoring team a mangkita kadagiti agdama a presyo ti mailaklako nga asukar kadagiti groceries ditoy probinsya ta maammuan no adda dagiti managgundaway a negosyante.
Naalarma ni Rafanan iti agdama a presyo ti asukar iso a tinawaganna nga insigida ni Assistant Regional Director Grace Lapastora iti Department of Trade and Industry ta maited kenkuana ti survey kadagiti nadumaduma a market ta maammuan no ania iti agdama a sitwasyon.
Saan a simple a problema iti nasao a banagta ado nga umili ti apektaranna kangrunaan dagiti pasdek negosyo kas kadagiti restuarant ken dadduma pay.
Impasigurado ni Rafanan nga insigida a maaksyonan ti nasao a banag tapno makita no adda iti hoarding a mapaspasmak ditoy probinsya nga immunan a pinasingkedan ti presidente nga adda iti kurang a supply ti asukar.
Posible a siripen ti gobierno probinsya dagiti bodega ken kiniddaw ti opisyal a saan a gundawayan dagiti negosyante iti agdama a sitwasyon ta saan a mailimed nga dagiti agdama nga stockda ti asukar ket nagatangda iti nalaka a presyo.
