VIGAN CITY – Saan nga agbaliw ti desisyon dagiti dadduma a kongresista a saan da nga umanamong iti pannaka isubli ti dusa a bitay ditoy pagilian.
Dayta ket uray nu addan iti bilin ni Presidente Rodrigo Duterte kadagiti miyembro ti 18th Congress nga aprubaran da iti gakat para iti pannakaisubli iti dusa a bitay ditoy pagilian iti kalkalpas laeng a maikapat a State of the Nation Address na idi July 22.
Ti pannaki-uman ti Bombo Radyo Vigan, kinuna ni Buhay Partylist Rep. Lito Atienza nga uray kaanu man ket saan nanto pulos nga anamongan iti pannakaisubli ti dusa a bitay ta ammo na a saan a nasayaat iti epekto na iti publiko, nangruna kadagiti agtutubo.
Gapu ti dayta, inallukoy ni Atienza dagiti pada na nga agpanpanday linteg a nu mabalin ket tutukan da laengen iti panangpapintas iti justice system iti pagilian ken nu kasanu a makemmeg dagiti bigtime drug pusher ken drug lord ditoy pagilian.
Kabayatanna, segun met ken ni Ilocos Sur 1st District Congressman Deogracias Victor “DV” Savellano a myembro ti supermajority ti Kamara, uray adu dagiti kritiko iti nasao a gakat ket ituloy da latta nga iduron ta isu iti makita da a maysa kadagiti manglapped kadagiti krimen a mapaspasamak gapu ti iligal a droga.
