Maysa a lalaki ti nakaduktal iti asawana nga adda nga adda sabali a lalaki a kaduana iti maysa a kuarto ti TNT Lodge idiay Barangay Darapidap, Candon City, Ilocos Sur.
Ti biktima ket agtawen iti limapulo ket dua, agnaed iti ili ti Galimuyod.
Ti met suspek a lalaki ket maysa nga engineer, agtawen iti innem a pulo ket pito, balo, agnaed iti siudad ti Candon idinto a ti suspek a babai ket agtawen iti tallopulo ket dua, agnaed iti ili ti Lidlidda.
Personal a nagreport ti biktima iti Candon City Police Station a ti asawana ket adda kabitna ken napan iti nasao a lodge.
Kinuyog dagiti pannakabagi ti linteg ti biktima iti nasao a lodge ket idi makasangpetda, binigbig ti biktima ti motorsiklo ti asawana.
Napan ti management ti lodge ken dagiti pannakabagi ti linteg iti kuarto dagiti suspek ket nakitada dagiti dua a suspek nga agkadua.
Nakataray iti comfort room ti babai a suspek idinto a ti lalaki a suspek ket nakakawes laeng iti T-shirt.
Imparang met ti biktima ti certificate of marriage da.
