Imbutaktak ni Julie Patidongan alyas Totoy a mapapati a nadukot dagiti sabungero ken napapatay iti maysa nga slaughterhouse iti asideg ti maysa a fishpond idiay Laurel, Batangas.
Segun ken ni Patidongan, dagiti dadduma a biktima a karaman iti game fixing ket naiballeng iti Taal Lake.
Immunan nga imbutaktak ni Patidongan a dagiti bangkay dagiti sabungero ket nabatonan iti sandbag tapno saanen a tumpaw ken agtalinaed laeng iti baba ti dan-aw.
Kinunana, ti sistema ket madukot dagiti sabungero ket iti sumaruno nga aldaw alaen dagiti suspek ti bayad kadakuada nga umabot iti kagudua a million a pios ken apaman a maalda ti bayad ket patayenda dagiti karaman, ubbing man wenno masikog ket awan iti ibatida.
Impakaammona pay nga adda dagiti polis a karaman iti kaso iti kayatna ti agsarita iti ammoda ken nakasagana a makitinnulong kadagiti otoridad.
Inawaganna a Vito ti maysa a lieutenant colonel a nagserbi a team leader a mapapati a nabayadan iti P2 million kada bulan para iti nabalin nga akemna.
Nakaituding nga agipasa ni Patidongan iti official affidavit-na inton Lunes mainaig ti kaso ti missing sabungeros.
