Hustisia ti kiddaw ni Charolaine Viloria, asawa ni Patrick Soria, delivery boy a biktima iti hit-and-run idiay Barangay Nanguneg East, Narvacan, Ilocos Sur.
Dayta ket gapu ta agingga ita ket saan pay laeng a simmuko ti drayber ti trak a nakaatal iti biktima.
Iti pannaki-uman ti Bombo Radyo Vigan ken ni Viloria, kiddawna a sumukon ti suspek tapno malag-anan met ti dagsen a marikriknana iti agdama.
Innayonna a nasingpet ti asawana ta ipasigurado a nakasagana amin a pagdigosda no mapan isuna agtrabaho ken no sumrek ti anakna a mapan agbasa.
Malaksid dayta ket nalaing pay a tumulong kadagiti nasken a maiwakas iti uneg ti pagtaenganda.
Inulila ti biktima ti asawana a nakadennana iti sangapulo ket maysa a tawen ken ti agtawen-iti-siam nga anakda a lalaki.
Maipalagip nga agpapa-abagatan ti motorsiklo idin ta idi nadanonna ti nakapasamakan ti insidente, saan a nakontrol ti drayber ti manibela ket naidarusdos iti kalsada ket naatalan iti trak a naggapu iti bangir a linya.
Gapu dayta, nagsagaba iti nakaro a dunor ti ulo ken adda pay marka ti pilid iti bagi ti biktima a naitaray iti ospital ngem naideklarar a dead on arrival.
