VIGAN CITY – Mamati ti minorya ti Senado a saan a masukatan ni Senate President Tito Sotto nga isu iti mangidaulo kadakuada inton sumrek ti 18th Congress ta awan met iti makita da a naan-anay a rason tapnu masukatan ken agpili da ti sabali a mangidaulo kadakuada.
Ti pannaki-uman ti Bombo Radyo Vigan ken ni Sen. Risa Hontiveros, inbaga na a nasayaat iti panangtaripato kadakuada a minorya ni Sotto ken marikna da nga awan iti panpanigan na ta agpapada iti panangtaripato na kadagiti miyembro ti minorya ken mayorya.
Segun ken ni Hontiveros, nakita da iti effort ti senate president a mangpatalinaed ken mangitandudo ti Senado kas maysa nga independent institution iti gobiyerno isu nga awan iti parikot da kenkuana.
Nu pay kasta, inaklon ti senadora a ti panagbaliw iti liderato ti Senado ket nakadepende latta kadagiti miyembro ti mayorya isu a nu kayat da a sukatan ti agdama a senate presidente ket awan iti maaramidan da ta bassit met iti bilang da a minorya.
