VIGAN CITY – Indeklararen ti Ministry of Health ti New Zealand ti red alert status gapu ti coronavirus disease 2019 uray no lima pay laeng iti kumpirmado a kaso ti nasao a sakit idiay New Zealand.
Ti report ni Bombo International Correspondent Estella Shayne Quinto a maysa a health practitioner idiay Blenheim, New Zealand, dagiti pasyente nga adda COVID na ket naggapu kadagiti nasurok a dua gasut a tattao nga indalanda iti monitoring ket isuda laeng ti nagpositibo ti virus.
Saan nga agliwliway ti Ministry of Health iti panangmonitor kadagiti COVID patients da idiay New Zealand ta baente kwatro oras a nakatutokda iti kasasaad da ken adda pay ti inactivate-da a hotline para kadagiti sumrek idiay New Zealand a naggapu iti sabali a pagilian a makarikna kadagiti sintomas ti agtrangkaso tapno matulongan ida iti gobierno ti nasao a pagilian.
Kabayatanna, idiay met Qatar, nangidekleraren ti Qatari government ti travel ban kadagiti pagilian nga apektado ti COVID- 19 a kas pinasingkedan ni Bombo International Correspondent John Delson Molina a maysa a nurse iti nasao a pagilian.
Segun ti report ni Molina ti Bombo Radyo Vigan, awan payen iti mapalubosan nga agday-off wennu agbakasyon kadakuada a nurse tapno masigurado nga adda iti makanay a medical staff dagiti ospital ti gobierno a mangtaming kadagiti pasyente a maapektaran iti nasao a sakit.
Iti agdama, adda ti sangapulo ket lima a kaso ti COVID- 19 idiay Qatar ket namnamaen iti gobierno a saanen a manayunan pay isu a nangiyetnagdan iti travel ban.
Idiay met Saudi Arabia, kas idiay Qatar ket addan ti sangapulo ket lima a kasoda ti COVID- 19 a kas maibasar iti kaudian a report ni Bombo International Correspondent Lia Grey ti Bombo Radyo Vigan.
Innayonna nga awan payen ti stock ti Al Nahdi Pharmacy kadagiti amin a klase ti face masks, alcohol ken sanitizer, pati ti Vitamin C isu nga awanen iti magatang dagiti tattao ta nagpanic –buying da idi maamuan da nga immadu ti COVID patients ti Saudi.
Ti Al Nahdi Pharmacy ti kadakkelan a pharmaceutical company idiay Saudi Arabia a kas pinasingkedan ni Grey.
