VIGAN CITY – Nakasagana a mangipila iti kaso dagiti sangapulo a biktima kontra ken ni Liberty Galima a taga-Barangay Ubbog, Candon City gapu ti mapapati a panangitarayna ti nasurok nasurok PHP2.8M.
Nabigbig dagiti biktima a da Marivel Dion, agtawen iti uppat a pulo ket tallo a taga-Barangay Calungbuyan; Mary Ann Ganat, agtawen iti tallopulo ket uppat a taga-Barangay San Isidro; Sharon Gacutan, agtawen iti tallopulo ket innem a taga-Barangay Patpata 1st; Rogielyn Acuyen, agtawen iti tallopulo ket uppat, mangisursuro a taga-Barangay Quirino ken ni; Jawher Rendon, agtawen iti duapulo ket innem, mangisursuro a taga-Barangay Baybayabas, Candon.
Biktima pay da Sheryl Galimba, agtawen iti tallopulo ket lima a taga-Barangay Patpata 1st; Allan Rodriguez, agtawen iti uppat a pulo ket lima a taga-Barangay Tablac; Alfred Pineda, agtawen iti duapulo ket uppat a taga-Barangay San Nicolas; Erika Ragma, agtawen iti duapulo ket lima a taga-Barangay San Jose ken ni Helaima Gatiw-an, agtawen iti duapulo ket siam a taga-Barangay San Nicolas, agpapada a taga- Candon.
Idi bulan ti Mayo agingga Setyembre ita a tawen ket nag-invest da iti bukodda a kuarta iti suspek babaen iti investment scheme.
Ni Dion ket naka-invest iti PHP800K; PHP520K ni Ganat; PHP330K ni Gacutan; PHP320K ni Acuyen; PHP280K ni Rendon; PHP230K ni Galimba; PHP60K ni Rodriguez; PHP200K ni Pineda; PHP50K ni Ragma ken; PHP15K ni Gatiw-an.
Ninamnama dagiti biktima nga umado ti kuartada ken aginteres iti nadumaduma a porsiento depende iti naituding a petsa ti payout ngem agingga ita ket saan pay a naisubli ti kuartada.
