Nasurok sangapulo ket dua a milion a pisos ti gatad iti marijuana a napagrut ken pinuoran dagiti otoridad a naala manipod iti uppat a plantasyon idi November 19-21 idiay Sugpon, Ilocos Sur.
Iti pannaki-uman ti Bombo Radyo Vigan ken ni Atty. Benjamin Gaspi a Regional Director iti PDEA Region 1, nangrugi iti operasyon iti maysa a plantasyon nga adda pito a sites-na idi November 19 idiay Licungan, Sugpon a nakaalaan dagiti operatiba iti 11,050 a piraso iti fully grown marijuana nga aggatad iti P2,210,000 ken 250 a piraso iti marijuana seedlings nga aggatad iti P10,000.
Simmaruno a naisayangkat iti operasyon idiay Sitio Sawangan a nakaalaan iti 13,400 a fully grown marijuana plants nga aggatad iti P2,680,000.
Kasta pay a naala manipod kadagiti lima a site iti 22,000 a piraso iti fully grown marijuana nga aggatad iti P4,400,000 ken 2,900 a piraso iti marijuana seedlings nga aggatad iti P116,000.
Idi November 21 ket naala manipod iti pito a sites iti 16,000 fully grown marijuana nga aggatad iti P3,220,000 ken 600 a piraso iti marijuana seedlings nga aggatad iti P24,000.
Segun ken ni Atty. Gaspi, awan iti nakemmeg a cultivator wenno nagmula ta patienda nga idi umul-ulida pay laeng a mapan kadagiti plantasyon ket addan iti nakakita kadakuadan a posible a nangidanon kadagiti agimulmula.
Agtultuloy iti pannakikammayet dagiti otoridad kadagiti maseknan a barangay ken umili tapno mamonitor dagiti agimulmula iti illegal a marijuana.
