Awan ti nadangran iti pannakatukbob ti trak iti sarsarunwenna a minibus iti paset ti bypass road a sumrek iti national highway, sakupen ti Barangay Tablac, Candon City, Ilocos Sur.
Nabigbig ti nagmaneho iti minibus a ni Joemar Caballes Miana, agtawen iti uppat a pulo ket pito, taga-Barangay Diome, Maria Aurora, Aurora.
Ti met wing van ket minaneho ni Manolinto Abrero Paet, agtawen iti tallopulo ket maysa, taga-Barangay Tay-ac, Bantay, Ilocos Sur.
Agpapalaud dagiti dua a lugan ket idi nagteng ti nakapasamakan ti insidente, nagmenor ti minibus a sumrek iti national highway nga agpa-amianan idinto a natukbob daytoy ti sumarsaruno kenkuana a wing van.
Agpada nga adda dadael dagiti dua a lugan a naipan iti Candon City Police Station para iti proper disposition.
