VIGAN CITY- Saan a nagballaigi ti New People’s Army iti gandat da a pabettaken ti military truck ti 81st Infantry Batallion ti Philippine Army idiay Sta. Cruz, Ilocos Sur.
Iti pannakiuman ti Bombo Radyo Vigan kenni Col. Julio Osias III, commanding officer ti 81st IB , posible a ti lugan dagiti suldado ti target ti NPA ta bimtak ti Improvised Explosive Device (IED) idi nakalabes ti military truck.
Segun kenni Osias, nagasat ti maysa nga ubing a nakamotorsiklo a simmarano iti lugan dagiti suldado ta saan a nadangran malaksid laeng iti pannakakigtot na gapu iti panagbettak.
Patien ni Osias a kabarbaro pay laeng ti miembro ti NPA a nangimuntar ti bomba gapu ta saan a nagballaigi iti kalikagum da a pabettaken ti lugan dagiti militar.
Naammuan nga agsubli kuman iti headquarters da dagiti suldado idiay Brgy. Bugbuga, Sta. Cruz kalpasan iti mobile patrolling idi napasamak iti panagbettak.
