VIGAN CITY- Nainget ti panangkontra ni AMIN partylist wenno Anak Ng Mindanao Partylist Rep. Amihilda Sangcopan ti martial law idiay Mindanao uray no taga-Mindanao ta patien na a saan a ti “military rule” ti solusyon kadagiti parikut idiay Mindanao ken awan ti naidatag a natibker a pagbasaran no apay a kasapulan ti martial law.
Ti exclusive interview ti Bombo Radyo Vigan kenni Sangcopan ,kinunana a maparmek laeng ti rebelyon ken kinarigat babaen iti panangited ii kasapulan dagiti umili babaen ti nainginget a serbisyo publiko dagiti nadumaduma nga ahensya ti gobierno.
Inpaganetget na a saanen a kasapulan ti martial law no laket mapapigsa ken agbalin nga epektibo ti pwersa dagiti pulis ken suldado nga agbantay iti seguridad para iti panagtalinaed ti linak ken talna.
Innayon ni Sangcopan nga apektado ti inaldaw a panagbiag dagiti agnaed idiay mindanao ta maikkat ti demokrasya idinto a sumagmamano kadagiti negosyo ti mapursaran nga agsara ti nasapa gapu iti naipatungpal a curfew a maysa kadagiti mangapektar iti ekononomiya iti nasao a rehiyon.
