Inrusat ti Philhealth iti intero a pagilian ti napalawa a Philhealth GAMOT wenno ti (Guaranteed and Accessible Medication for Outpatient Treatment) iti salinong ti Philhealth YAKAP Program.
Babaen iti programa ket makaawat iti libre nga outpatient nga agas iti agingga P20,000 iti tinawen ti kada miembro a kwalipikado iti nasao a programa.
Gagem ti addang a masurot ti pammilin ni Presidente Ferdinand Marcos Jr a pagbalinen a nalaka ken accessible ti programa a para iti salun-at ti kada umili.
Sakupna ti pitopulo ket lima nga agas para iti impeksyon, angkit ken COPD, diabetes, nangato a kolesterol, hypertension ken sakit iti puso.
Kayatna a sawen ket awanen ti masapul a bayadan kadagitoy nga agas no la ket masigurado a nakarehistro iti napili a Philhealth YAKAP Clinic, agpakonsulta iti primary care physician para iti medical assessment, mangala iti resta nga adda Unique Prescription Security Code-na ken ipakita ti reseta ken maysa a valid government ID iti sadino man nga accredited GAMOT Facility.
