VIGAN CITY – Nadismaya ni ACT Teachers Partylist Rep. France Castro iti maikalima a State of the Nation Address ni Presidente Rodrigo Duterte ta saanna a nangngegan dagiti addang ti gobierno iti COVID19 crisis ti pagilian.
Iti pannaki-uman ti Bombo Radyo Vigan ken ni Castro, rumbeng koma a ti linaon ti panagsaritana ket no kasano a matulonganda dagiti umili a naawanan ti pagsapulan gapu iti Covid19, badyet para iti blended learning ken ti internet allowance para kadagiti mangisursuro.
Patien ni Castro nga inaramat ti presidente ti SONA para kadagiti personal a parikutna gapu iti pammatina nga ikalkalintegan ni Senate Minority Leader Franklin Drilon ti pamilia Lopez ngem nupay kasta, pakaragsakan ti kongresista iti panangballaag ti presidente iti parikut iti Telephone company ken namnamaenna a matignayan agingga inton December.
Ingunamgunamna a naballigi met ti naisayangkat a protesta ta uray pay no nangbutbuteng ni Interior Secretary Eduardo Ano ket natuloy latta ken nayebkas ti riknada kontra kadagiti paglintegan nga impatpatungpal ti agdama nga administrasyon.
