Pinasingkedan ni Commission on Higher Education (CHED) chairman Prospero de Vera bayat ti panagdengngeg ti Senado maipapan iti naisingasing a badyet ti ahensia iti 2025, a maysa kadagiti rason nga agsardeng wenno agdrop-out dagiti estudiante iti kolehio ket gapu ti mental health concern.
Dagiti kangrunaan a 5 a rason tapno agsardeng nga agadal dagiti estudiante iti kolehio ket dagiti pinansial a parikut, sarunuen ti parikut iti pamilia, maikatlo ket ti relocation, maikapat ket dagiti medical/ mental health concern ken maikalima ket ti academic difficulty.
Gapu kadagitoy a rason, kinunana a saanda a ninamnama ti panagadu ti kaso ti panagsardeng gapu iti mental health concern.
Segun kenni De Vera nga addan dagiti programa nga ipatpatungpal ti CHED nupay aminadoda nga agkurang dagiti guidance counselor iti higher education.
Gapu dayta, kiniddaw ti CHED chairman iti Senado a baliwan ti linteg a mangimandato nga umuna ti master’s degree sakbay a makagun-od iti licensure exam tapno agbalin a guidance counselor.
