Imbes a mangisayangkat iti protesta, nasken nga agtinnulong tapno malasatan ti epekto ti krisis iti Middle East.
Dayta ti sungbat ti Malakanyang iti panangibaga ti grupo a Piston wenno Pagkakaisa ng mga Samahan ng Tsuper at Operator Nationwide a mangisayangkatda iti nationwide transport strike no agtultuloy ti panagpangina ti presio ti langis.
Segun ken ni Palace Press Officer Atty. Claire Castro, ad-adda a kasapulan ti panagkaykaysa ken panagtitinnulong ita a panawen imbes a nayonan ti rigat dagiti commuter.
Inyunay-unay ni Castro a saan a kinayat ti gobierno ti sitwasion iti agdama, ken ad-adda manen a saan a basul ti Presidente ken gobierno.
Kinunana pay a maim-imatangan ti publiko nga ipangpangruna ti Presidente ti panangted iti ayuda iti transport sector babaen iti tulong pinansial ken fuel subsidy isu a masapul ti panagawat ken panagtalek iti decision ti gobierno.
