Menor de edad, nagtakaw iti maysa a store

VIGAN CITY – Naipasidongen iti City Social Welfare Development Office ti maysa a menor de edad a nagtakaw idiay Gomez St. Brgy IV, Vigan City.

Dagiti biktima ket da Stanley Garcia, agtawen iti duapulo ket pito ken ni Santiago Vizcarra, agtawen iti innem a pulo ket pito nga agpada nga agnaed iti nasao a lugar.

Iti pakauna nga imbestigasyon, makita iti CCTV iti uneg ti maysa a store idiay Bonifacio St ken Gomez St. Brgy IV, Vigan City a simrek ti suspek ket intarayna ti PHP18K a nakaikabil iti plastic container sa naglibas iti konkreto nga alad ket inikkatna ti barbwire babaen iti plier.

Nupay kasta, naisayangkat ti hot pursuit operation a nakakemmegan ti suspek ken pannakaala dagiti tinakawna a kuarta.