VIGAN CITY – Nasarakan a natay ti maysa a menor de edad a mapapati a nakimat idiay Sitio Nagsabaran, Brgy. Oaig-daya, Candon City.
Ti biktima ket ni Jerwin Astrero Agrisola, agtawen iti sangapulo ket uppat, estudyante nga agnaed iti nasao a lugar.
Segun ti Candon City Police Station, nagturong iti taltalon ni Jose del Rosario Galima, agtawen iti tallopulo ket uppat, mannalon nga agnaed met laeng iti nasao a lugar iti alas kuatro iti bigat itattay tapno agala iti tukak idin nakitana ti biktima a nakaidda iti taltalon a nakatangad nga addaan iti nadadael a flashlight a mapapati a nakimat.
Alas dies iti rabii idi July 16, 2022 idi nagpakada ti biktima iti ikitna a ni Mary Ann Astrero a mapan mangala iti tukak iti taltalon ngem napaay a nagawid kagiddan iti natudo ken nakimat a panniempo.
