VIGAN CITY – Dead on arrival iti pagagasan ni Clamarie Guerzon, agtawen iti sangapulo ket lima a taga-Pacang, Sta. Maria ta mapapati a nagbekkel iti mismo aldaw ti panagkasangayna idi kalman.
Iti pannaki-uman ti Bombo Radyo Vigan ken ni PLt. Joel Dasargo, nasarakan ti amana a nakabitin ti biktima iti uneg ti kuartona ket dagus nga imbabana ken impan iti ospital ngem saanen a naispal pay ti biagna.
Alas dos iti malem idi kalman ket nagpakada ti biktima a mapanda agdidigos iti kabarbaro a resort iti nasao nga ili ngem saan a napalubosan ta amangan nga adda madi a mapasamak agsipud ta birthdayna.
Malaksid ti dayta innayon ni Dasargo, a mapapati naalisan iti kallabes ti biktima ken pinagsina ida dagiti nagannakda gapu ta ubbingda pay ket masapul nga ituloyda ti agadal nga isu ti maysa kadagiti mapapati a pakarikrikutanna.
Nupay kasta, mapagpapatangan no maidalan iti autopsy ti bangkay ti biktima tapno duktalen no adda wenno awan ti foul play iti napasamak.
