Dead on arrival ti maysa a menor edad kalpasan ti napasamak nga aksidente iti Barangay Road sakupen ti Barangay Butir, ili ti Sta. Maria.
Ti nagmaneho ti Yamaha Mio motorcycle ket agtawen ti sangapulo ket innem, kalubbon na ti agtawen ti sangapulo ket innem ken sangapulo ket lima, agpapada nga ALS students, residente da iti Barangay Gusing, iti nadakamat nga ili.
Iti pannakiuman ti Bombo Radyo Vigan ken ni PLT. Jenson Refuerzo, ti motorsiklo ket agturong iti daya a direksion ket idi nagteng da ti nakapasamakan ti insidente, partikular iti kurbada a paset ti kalsada, naawan ti kontrol ti nagmaneho ti motorsiklo rason ti pannakaidungpar da iti konkreto nga alad iti left shoulder ti kalsada.
Nagsagaba ti drayber iti motorsiklo ti head injury kabayatan a ti dua a kalubbon na ket nadunor iti agduduma a paset ti bagi a dagus da a naitaray iti balay pagagasan para ti naan-anay a pannakataming da ngem naideklarar a dead on arrival ti nagmaneho ti lugan.
Segun ti maysa a back rider, mapapati a nadungpar isuda ti maysa a lugan isu a na-aksidente da.
Nupay kasta, basar iti imbestigasion pay dagiti pannakabagi ti linteg, awan ti physical evidence a mangpaneknek nga adda napasamak a contact ti nagbaetan ti motorsiklo ket ti sumungad a lugan.
