Umaboten iti 23 a menor de edad a naglabsing iti curfew hour ti natiliw ti Sta. Cruz Police Station sipud Abril 7, 2026.
Maibasar iti ordinansa a maipatpatungpal, epektibo ti curfew hours manipud alas nuebe iti rabii agingga alas singko iti bigat kadagiti menor de edad.
Iti pannaki-uman ti Bombo Radyo Vigan ken ni Police Executive Master Sergeant Israel Albay, kaadduan a natiliw ket dagiti adda iti ruar a nakatambay ken agaayam iti cellphone.
Dagitoy a menor de edad ket naipan iti Municipal Social Welfare and Development Office para iti counselling ken naiturn-over met laeng kadagiti nagannakda.
Maibasar iti maipatpatungpal nga ordinansa iti nasao nga ili, ti 1st offense ket isu ti pannakaipan dagiti menor de edad a matiliw iti MSWDO, 2nd offense ket agmuelta dagiti nagannak iti P500, ken 3rd offense ket agmuelta iti P2,000 ngem no saanda a kabaelan ket ag-community service-da iti 48 hours.
Impaganetget ni Albay a dakkel a tulong ti panangipatungpalda iti daytoy nga ordinansa tapno maliklikan wenno maibaba dagiti krimen wenno aksidente a mapasamak a no dadduma ket dagiti menor de edad ti karaman.
