Boluntaryo nga insuko ti inana ti maysa a menor de edad a nangdanog iti maysa a Grade 11 student idiay Barangay Cabaritan, Sto. Domingo, Ilocos Sur.
Ti suspek ket agtawen iti sangapulo ket uppat, Grade 8 student idinto a ti biktima ket ni Patrick Dias, agtawen iti sangapulo ket siam, agpada nga agnaed iti nasao a lugar.
Personal a nagturong ti biktima iti Sto. Domingo Police Station tapno ireport ti panangdanog kenkuana ti suspek a nagusar iti knuckle.
Sakbay ti pasamak, naggapu ti biktima ken ti nobiana a nagbuya iti basketball iti barangay plaza ket idi agawidda babaen iti panagluganda iti motorsiklo, nakitada ti suspek a nakalugan iti e-bike.
Iti dayta a gundaway, nakita ti suspek ti biktima ket pinasardengna daytoy sa dimsaag manipud iti e-bike na.
Awan ti ania man a sinasao ti suspek no di ket bigla a dinanogna ti rupa ti biktima isu a nagsagaba iti dunor iti akin-kannigid a paset ti pingpingna, ken contusion wound wenno lamma ti akin-kannigid a matana.
Dagus met a pimmanaw ti suspek kalpasan ti insidente.
