VIGAN CITY – Agpapalaing iti ospital ti maysa a menor de edad a lalaki ta binagkong ti kapadana a menor de edad idiay Brgy. San Jose, Narvacan, Ilocos Sur.
Iti pannaki-uman ti Bombo Radyo Vigan ken ni PMaj. Arcadio Viloria iti Narvacan Municipal Police Station, bayat ti panagawid ti suspek nga agtawen iti sangapulo ket lima ket sinaruno isuna ti biktima nga agtawen met laeng ti sangapulo ket lima ket bigla a dinanog ti biktima iti ulo ti suspek agingga nagkinnabilda.
Segun ken ni Viloria, idi napaidda dagiti dua ket inasot ti suspek ti folded a kutsilyona ket binagkongna iti namin-uppat a daras ti biktima ket kalpasanna, pimmanaw ti suspek ngem nalapdan isuna ti bystanders nga adda iti nasao a lugar ket nai-turn over kadagiti pannakabagi ti linteg.
Mapapati a ti biktima ket kanayonna nga i-bully ti suspek isu a limmabanen iti dayta a gundaway.
Naipan ti biktima iti Ilocos Sur District Hospital, Narvacan para ti pannakatamingna idinto a ti suspek ket adda itan iti Municipal Social Welfare and Development para iti assessment-na ken maamoan nu adda discernment wenno awan iti nasao a pasamak.
Naala iti folded a kutsilyo nga adda kaatiddogna a pito a pulgada pakairamananen ti handle-na.
VC – PMAJ. ARCADIO VILORIA
Panawagan ni Viloria kadagiti estudyante ken agtutubo a nu adda iti parikot wenno karirriri ket nasaysayaat nu ipakaammo kadagiti adviser tapno masimpa iti sitwasyon babaen ti guidance counselor tapno saanen a maulit iti kas iti nasao a pasamak.
VC – PMAJ. ARCADIO VILORIA
