Nasarakanen ti menor de edad nga agtawen iti sangapulo ket uppat a nalmes iti kabaybayan idiay Barangay Pinipin, Sta. Cruz, Ilocos Sur.
Ti pannakasarakna ket babaen kadagiti mangngalap a nakabilog a dagus met a rinespondean dagiti maseknan.
Dua gasut a metro ti kaadayo ti nakasarakan iti bangkay ti menor de edad manipud iti igid ti kabaybayan.
Iti pannaki-uman ti Bombo Radyo Vigan ken ni Barangay Captain Casimero Corpuz, ti ubing agraman dagiti dua a kaduana ket pasaray a mapanda iti kabaybayan a nakabisikleta ket napanda nagdigos idi kalman uray no nadawel ti kabaybayan.
Awan met ti matatao iti dayta a tiempo isu nga awan ti nakakita wenno nakaarayat kadakuada.
Immunan a naisalakan babaen iti retrieval operations idi kalman ti agtawen iti sangapulo ket maysa a daytoy ket naipan iti ospital para iti naan-anay a pannakatamingna.
